旺角呢啲鬧市嘅空氣固然勁污染，其他地區都係一擔擔，唔會清新得去邊。本報曾經委託顧問公司測試香港多個地方嘅空氣質素，連接藍田港鐵站嘅交通交匯處，唔量過都唔知，居然每公升有差唔多五十萬粒懸浮粒子，最高仲有六十萬粒。
叮佢個鎯鎯，唔知環境局局長邱騰華知唔知，根據歐洲國家標準，超過三十萬粒懸浮粒子係代表乜呢？原來已經達到「不適宜逗留」水平。依家多出一倍咁多，簡直就係一個毒氣室啦。
所以「污染之都」並唔係浪得虛名㗎，一早臭名遠播天下知。澳洲外交部咪試過發出針對本港空氣質素嘅旅遊忠告囉，叫當地國民嚟香港時自己執生。話時話吖，澳洲都算係咁啦，香港空氣質素達到「不適宜逗留」水平，何止係「旅遊忠告」，發「旅遊警告」都得呀！
冇辦法，邱騰華明知空氣差成咁，但一直翹埋手等藍天識路自己返嚟囉，見到電廠排放呢啲污染源頭就腳仔軟，當係睇唔到聞唔到就算，一味淨係識得度埋啲屎橋出嚟扮環保交差，仲閉門造咗好多「車」出嚟添。
「停車熄匙」——太一叮懷疑成班環保高官一到夏天即刻飛去第二度抖暑，如果唔係，點會唔知香港嘅夏天熱到嘔，閒閒地都三十度，太陽兜頭曬，車廂溫度隨時高達攝氏四、五十度呀老友？呢嗱，停車熄匙未出籠，已經出現咗司機與乘客衝突嘅畸士，到咗真正要落實執行嗰時，呢啲紛爭更加係無日無之。
「電動車」——近排邱騰華做咗「電車男」狂Sell電動車，之但係成個計劃認真超現實，車價貴到嘔，出街想搵地方叉電又難。咁電又邊度嚟？咪又係電廠，邱局長唔去改善電廠排放呢個最大空氣污染源，根本就係本末倒置。
「流動回收車」——環保署為咗推廣電腦廢料處理，整咗部回收車，話就話可以收集舊電腦以及電器，咁成績又點呢？一年來，只係收咗一千四百幾部舊電腦，同全港每年一百五十萬件電子廢料總數一比，簡直係九牛一毛。
叮佢個鎯鎯，有咁廢柴嘅官喺度搞環保，講就天下無敵，做就有心無力。小市民都要打定輸數被迫做「肺柴」，唔係講笑，吸吸埋埋，個肺遲早打柴都得嘞！