賭王何鴻燊尋日拖埋四太梁安琪同愛女超雲入馬場，為愛駒「爆冷」同「爆炸」打氣，惟「爆炸」四甲不入，反而「爆冷」以次熱門姿態勝出，贏得花旗集團冠軍暨遮打盃，連同贏得上次三冠大賽次關賽事，共獲六百萬元獎金。
「爆冷」衝線嗰刻，企喺看台嘅四太肉緊到雙手緊握賭王膊頭猛搖，而超雲就笑到擘大個口，當時賭王仲未睇清楚「爆冷」輸定贏，獲悉勝出後先展露四萬笑容，四太繼而同超雲擁作一團。賭王笑稱「爆冷」好似佢咁老當益壯，又話好似「Johnny Walker」威士忌口號咁「Keep Walking」。
問四太點慶祝，佢話賭王有朋友請飲，所以要揀過其他日子慶祝。至於嚟緊會唔會同賭王去旅行，佢話：「唔得喎！去唔到，因為七月澳門特首選舉，到時我哋好忙，好多嘢要做㗎！」