針對金融海嘯對港人造成唔少負面影響，3L嘅立法會議員「蘇菲」梁劉柔芬創立咗社區導者學會，仲搞咗個名為「拍開你的心」嘅活動，鼓勵港人喺逆境下拍多啲開心照片，就因為咁，連帶蘇菲都變咗攝影發燒友，仲將部「黑莓」手機當相機，去到邊影到邊，佢尋日趁住「開拍禮」展出自己嘅作品。
蘇菲嘅作品驟眼睇冇乜特別，因為相中全係不知名嘅小花小草，但佢就喺張相下面加咗句話，為照片點睛：「無名小草都可以美麗，都可以活得精彩。」佢想透過呢張相令港人明白，即使面對逆境都唔可以睇小自己嘅能力而妄自菲薄。
佢又當眾傳授影「開心相」嘅秘訣，就係喺舉機前先令自己開心，影出嚟嘅相自然會感染到拍攝者嘅心情喎！