涉案疑兇患有重症精神病，早年住過葵涌醫院，出院後一直接受定期治療，月初覆診嗰陣，醫生話佢病情冇問題，安排七月再覆診，點知冇幾耐就出事。如果醫院當初檢查得仔細啲，判斷病情謹慎啲，等患者有適當治療，慘劇話唔定可以避免，老來得子嘅晉仔阿爸就唔使白頭人送黑頭人咁陰功。
食物及衞生局副局長梁卓偉尋日話，唔能夠百分之一百擔保呢類悲劇唔再發生。佢仲話，醫管局醫治精神病患者嘅方向同世界大趨勢相近，如果病情受到控制而又定期覆診，會盡早畀患者融入社區。
叮！問題根本唔關世界大趨勢事，點解咁多醫院話病情OK嘅病人，出院之後冇事變有事，而且幾乎單單都大鑊？五月初，土瓜灣一個同患精神病嘅三口之家，五十歲女兒懷疑病發，用鐵錘擊斃自己嘅阿媽。事隔幾個禮拜，又發生晉仔被斬案。慘劇一再發生，醫管局唔係想精神病患者盡早融入社區，而係想將佢哋當包袱踢畀社區就真。
其實，公立醫院精神科服務長期嚴重不足，過去五年病人數目累積增加咗近三萬人，但入院人數反而不斷下降。你話怪唔怪？鬼咩，依家每個精神科醫生平均要處理五百幾個病人，邊可能做得切吖。一般病人三、四個月覆診一次，病情嚴重先覆診密啲，咁搞法，唔出事至奇啦。
資源短缺，服務供不應求，醫生平均五、六分鐘睇一個症，你話病人有乜可能得到適當嘅診斷同治療吖。表面睇冇乜唔妥，咪留喺社區囉。
近年涉及精神病患者出院後因為支援不足導致嘅慘劇，最震撼係○七年天水圍三母子墮樓慘死案。喺呢宗慘案入面，有位得一年幾資歷嘅醫生，未審慎了解患有精神病媽咪嘅病情就畀佢出院，懷疑係造成悲劇嘅主因。
叮！一個個慘劇表面睇都係單獨個案，查實係食物及衞生局局長周一嶽掌管嘅公共醫療系統資源錯配種落嘅惡果。醫管局高官淨係識肥上瘦下，前線資源長期不足，人手短缺，佢哋一於當睇唔到。服務質素愈來愈差，甚至連認真評估精神病人病情同提供適當治療呢啲咁基本嘅嘢都做唔到。
最離譜嘅係，醫管局唔去調整架構，增撥資源，反而諗出個「藥物名冊」嚟留難病人。當局為咗慳錢，一味開啲價錢平但副作用多多嘅藥畀精神病人。唔少人因為咁而少食甚至唔食藥，連睇病都怕怕，病情隨時有變，社區危機四伏。
叮佢個鎯鎯！醫管局失職，周一鑊懶理，病人由輕症變重症；公立醫院資源問題愈嚴重，涉及精神病人嘅慘劇就愈震撼。所以話，醫管局其實係導致慘劇不斷發生嘅間接兇手！