「啲垃圾堆到成座山咁，同食環署投訴咗成個月都係咁，依家豬流感又咁勁，仲話搞乜嘢清潔，都係得個講字！」油麻地唐樓居民湯先生指出，區內不少沒有公德心的居民均愛隨手將垃圾拋出窗外，令僭建簷篷上的垃圾愈積愈多，因無人清理而變成垃圾山。
「殘渣衞生巾諗到都有」
湯先生近月來每逢打開窗戶，即有異味迎風而至，最初亦不以為意，直至臭味愈來愈濃烈，探頭一望才驚見下層簷篷堆滿垃圾，保守估計足可盛滿二十多個竹籮：「真係嚇死你，啲垃圾乜都有，食物殘渣、衞生巾、膠袋，諗到都有！」湯先生即時向食環署求助，但職員回應卻令他啼笑皆非：「佢話個簷篷係僭建嘅，叫我搵屋宇署；之後又話搵唔到個業主，所以一直處理唔到！結果成個月都未搞掂，冇辦法惟有搵《東方》。」
當區區議員許德亮坦言有關情況見怪不怪，並指區內不少僭建簷篷同樣淪為「垃圾崗」。許與記者落區視察期間，發現廣東道、新填地街及上海街等，不少大廈的簷篷均堆滿垃圾，其中甘霖街一幢大廈的簷篷更傳出陣陣中人欲嘔的惡臭：「民政事務局局長落區清潔有乜用？只要喺呢度是但搵間屋瞓一晚，佢就知有幾臭！」
許指該區大部分舊樓至今仍未成立業主立案法團，僭建物與垃圾堆積問題一直未能妥善解決：「食環署應該叫啲業主自己清（垃圾），屋宇署就唔該做嘢啦，快啲拆走啲簷篷啦！」許要求當局重視問題嚴重性，加強執法。
有人染疫先處理已太遲
立法會民政事務委員會委員陳克勤則認為，豬流感仍存在社區爆發危機，政府部門在非常時期不應再拘泥於職責與分工：「舊區好多唐樓成立法團時都有困難，屋宇署係唔係咁就唔使理啲僭建簷篷呢？唔通又等有人感染先去處理？已經太遲啦！」
食環署發言人指出，已即時要求簷篷所屬單位業主清理簷篷上的垃圾，經職員覆查後亦證實垃圾已被清理。發言人強調，該署可引用《公眾衞生及市政條例》要求私人物業業主清理在私人樓宇範圍、而又影響環境衞生的垃圾；倘業主拒絕遵守規定，即屬違法。至於有關僭建簷篷問題，至截稿前仍未獲屋宇署回覆。