現代人尤其女性好容易出現骨質疏鬆現象，骨科專科醫生、前醫院管理局總監高永文透露，呢個病「預防勝於治療」，佢自己就喺後生時，已經成日做負重運動，多行路行山，做多啲運動，同時每日都會食豆腐、飲豆漿，吸取多啲鈣質，防止骨質疏鬆。
高醫生話，骨質疏鬆最慘就係冇明顯病徵，所以事先要做足預防。一般人好鍾意到健身室舉重，高醫生就覺得呢類運動好容易整傷身體，佢話行路其實都係負重運動嘅一種，一樣可以做到預防骨質疏鬆，難怪佢平時都有去行山觀鳥、參與慈善步行等，成日行來行去，都做到一定嘅預防作用。除咗做運動，佢又話自己好注意飲食，每日都會飲一杯豆漿，吸取鈣質。
