本文重點
豬流感殺到後，食物及衞生局副局長梁卓偉日日主持430疫情記者會，做咗疫情發言人，政府抗疫工作有唔少漏洞，佢經常畀人逼埋牆追問，壓力真係好大。尋日佢透露減壓大法就係做運動，不過做官之後群體運動冇晒份，佢只可以自己一個人孤獨跑步。
梁卓偉尋日出席「擁抱健康生活博覽2009」，講到自己減壓方法時，佢話近排工作量多咗好多，但佢幾忙都會抽時間去跑步，保持身體健康。佢仲呻做咗副局長後，已經少咗去踢波同打籃球，事關呢啲群體運動通常都會約埋一班人，但佢預唔到自己嘅時間，為免應承人之後又要甩底，所以惟有謝絕呢啲群體活動，所以佢家吓經常形單隻影，孤獨做運動。除此之外，佢都會搵朋友同屋企人傾偈，或者玩吓音樂。
原來好有音樂天分
唔講唔知，梁卓偉好有音樂天分，細細個就學鋼琴，做過兒童樂團嘅主音；去加拿大讀醫嗰陣，仲攞埋音樂碩士學位，學埋指揮，而且擔任過加拿大葉氏兒童合唱團嘅首席指揮添。