豬流感（H1N1甲型流感）疫情全球擴散，偏偏暑假在即，好多人都會遠行，搭飛機在所難免，富貴黨主席劉健儀（Miriam）經常去美國探親，問佢坐飛機會唔會好似前主席田北俊咁，只揀頭等機艙坐，佢好謙咁話：「頭等機艙？咁貴，我邊度坐得起呀，田少就有資格坐！」
田少早排話，唔想坐飛機受感染，咪坐頭等囉，人少啲、隔得又疏啲，好好多。不過，Miriam嘅策略就同佢唔同，雖然佢口講頭等機位太貴，但佢絕唔係坐唔起，而係唔坐啫。
從佢哋坐飛機嘅態度都反映兩個人嘅分別，富貴黨要維持「中間偏右」路線，黨主席就梗係平實啲好啦，咁樣先有利爭取中小企支持嘛。