政府公布金管局總裁任志剛十月一號任滿後，只話成立三人小組研究繼任人問題，事後被踢爆以黑箱作業嘅手法，內定咗特首辦主任「攞命陳」陳德霖接替任總，泛民議員好唔滿意呢個安排，決定喺下禮拜三嘅立法會大會緊急辯論呢次事件。鬍鬚曾尋日朝早出席一個電台節目時，大耍太極，話自己出訪歐洲，出席唔到呢次辯論。
鬍鬚曾話，佢一早定咗聽日起出訪歐洲十二日，由俄羅斯、瑞典到英國，一次過玩勻半個歐洲大陸。佢仲話，自己好希望親身列席辯論回應議員批評，但外訪在即實在冇辦法喎。
說話講得好聽，但主持人再問係咪內定攞命陳時，鬍鬚曾又忍唔住變臉，重申單嘢仲有啲程序未完成，依家唔方便講任何嘢。鬍鬚曾走咗去，梗係又輪到有傻強之稱嘅財經事務及庫務局局長陳家強署理財政司司長，到時亦會代佢列席立法會嘅辯論，幫鬍鬚曾做箭靶，雖然佢唔係第一次代鬍鬚曾啃衰嘢，但三人小組又唔係向佢報告，佢呢鋪真係整定背既定答案嘞。