本文重點
新一屆立法會組成後，各種研訊排山倒海而來，立法會好似變咗半個法庭咁，日前立法會秘書處宣布新措施，引入法庭畀證人出庭津貼嘅做法，不過立法會嘅證人最高時薪只係四十五蚊，呢個清潔工時價對於一眾畀立法會傳召去作證嘅非官即阿頭、非富則貴人士嚟講，真係好諷刺。以嚟緊要作證嘅梁展文，同已經作過證嘅新世界中國主席鄭家純為例，佢哋
開嘅時薪冇一萬都有幾千，四十五蚊津貼真係少得可憐！
開嘅時薪冇一萬都有幾千，四十五蚊津貼真係少得可憐！
公職人員冇得攞津貼
立法會行政管理委員會規定，每個證人出席少於四小時嘅立法會相關委員會會議，可申索一百八十元津貼；多過四小時嘅，就可以申領三百六十元。不過，現職公務員、公職人員唔可以申請呢個津貼。
唔好睇小呢四十五蚊時薪，好多快餐集團嘅清潔工、兼職員工時薪都只得二十幾三十蚊，早排馬會喺天水圍請兼職，畀出四十一蚊時薪已經搞到千人冒雨排隊爭崩頭嘅景象。據講，呢個安排會追溯至舊年十月一日，即係新一屆立法會開始工作以嚟嘅研訊證人都可以申領。
不過，立法會行管會認為呢個措施彌補證人出席研訊嘅開支固然無可厚非，但要彌補證人入息嘅損失就可圈可點，事關立法會證人雖然嚟自各階層，但大部分都係有權有勢兼有錢嘅高薪一族，好似今年以嚟，立法會先後組成專責委員會同專責權小組，就雷曼迷債、梁展文事件展開研訊，加埋因應一年兩度審計署報告展開嘅政府帳目委員會研訊等，獲傳召嘅人大部分係政府同公營機構嘅高層。
好似金管局總裁任志剛出席雷曼事件調查研訊，因佢屬公職人員，所以冇得攞津貼，被同一委員會傳召嘅鄭家純、新世界集團嘅梁志堅就唔受影響，連至嚟緊出場嘅房屋及規劃地政局常秘梁展文都因為係前公務員，一樣可以申請津貼。只係，呢班非富則貴人士會唔會向立法會秘書處攞表、填表，等批四十五蚊時薪嘅津貼呢？所以話，行管會一方面以低廉市價設立津貼、塞住證人把口，一方面開支又唔會大增，真係除笨有精！