嗱，睇吓本報記者上個月跟蹤其中一隊五人小販隊所見到嘅，就知唔係齋噏啦。嗰班大懶蛇下晝三點幾由元朗出發，兜咗大半個鐘冇落過車，跟手駛入天水圍警署歎下午茶；個幾鐘之後繼續喺區內「車上巡邏」，六點幾入咗食環署車廠，有人爆料話，佢哋其實喺入面睇電視、歎報紙、瞓大覺咋。
跟住做乜？遊多陣車河咪出街開飯囉，飯後再揸車兜吓，返車廠歎吓，夜晚十點至喺天耀邨落車，企喺車邊傾一輪閒偈，巡都唔使巡吓，十點半就收隊返元朗等收工。成日流流長，正式同職責有關嘅嘢，就做得呢半粒鐘。市民交咁多稅，居然養班咁嘅蛇王，你話有乜辦法唔眼冤吖。
食環署員工吞泡已經唔係乜新聞，小販隊更加係蛇王中嘅蛇王，醜聞多到數埋手指腳趾都數唔晒。本報舊年就踢爆過，食環署九龍區總部小販隊話就話連食飯每日做八個半鐘，但大部分時間唔係遊車河，就係歎茶睇報紙、打牙骹，一日只做一個半鐘。
叮！諗唔到過咗近一年，情況冇改善不特止，仲差咗添。居然返工當度假，大模廝樣坐住公家車去吞泡，一日做粒半鐘都嫌多，半粒鐘仲係長，最好就齋
人工唔使做。食環署拍心口話要改善管理，仲話會加強俗稱「狗仔隊」嘅服務質素檢定組去捉蛇，效果係點？一眼睇晒啦！
有知情人士篤爆話，「狗仔隊」根本發揮唔到作用。梗係啦，未做嘢已經走漏晒風聲，仲白癡到揸住架政府車去「跟蹤」，驚死人唔知署方做緊嘢咁，乜蛇都走清光啦。咁搞法，同大鑼大鼓去捉賊有乜區別吖？所以話，食環署根本就冇誠意，亦冇決心去解決小販隊前線人員工作態度馬虎嘅問題。
咪睇小販隊班人做嘢一條蟲，佢哋濫用職權、發起官威上嚟，不知幾咁惡死。舊年年底，有位市民喺荃灣見到佢哋無理留難持牌小販，要求對方出示證件，點知畀人明屈「妨礙公職人員辦公」要檢控，署方後來先至死死氣話唔起訴。仲有，有個七十幾歲嘅阿伯喺金鐘一幢大廈停車場天橋幫人擦鞋擦咗十六年，上個月底突然收到食環署話佢阻街嘅傳票，連搵食架生都沒收埋，好彩有熟客求情，法庭判罰款了事。
叮！唔該卓永興睇住班手下咪亂嚟啦，小販隊愈蛇愈離譜，呢隊蛇完嗰隊蛇，九龍蛇完新界蛇；公家車變咗觀光車，工作場所變埋蛇竇，你究竟管唔管㗎？管唔掂就換第二個，咁鍾意攞納稅人啲錢養蛇，不如早啲返屋企養飽佢啦，大蛇王！