尋日喺一個書畫展見到城大校長郭位，原來佢都染上流感，足足病咗成個月，咳嗽仍然未清，可惜上任城大校長後工作馬不停蹄，啱啱至去完台北同美國公幹，短短兩個禮拜內合共飛咗五、六個城市，轉機都轉到頭暈，佢苦笑話：「我衰老喇，好耐未試過病得咁嚴重！」佢仲特別叫其他人唔使避開，因為佢啲輕微咳嗽唔會傳染人喎。
佢跟住自爆話月前病倒入住本港私家醫院時發生一段小插曲，話說佢出院幾日後，突然收到院方電話，話醫生本來處方嘅係傷風藥，但開錯咗抗生素畀佢，叫佢馬上返醫院換藥。其實佢收到電話時已經將啲藥食晒，即係硬食咗幾日抗生素。入院已經好傷，仲要無端端食錯藥，簡直就係雙重打擊！
