要防止豬流感疫情擴散，除政府要做好檢疫工作外，作為第一道防線嘅家庭醫生亦起重要作用。日前遇到身兼馬會董事、現任世界家庭醫生學會亞太區域主席嘅李國棟，佢預告嚟緊六月四號起一連四日，灣仔會展會舉行世界家庭醫生學會亞太區域會議，屆時會有包括愛滋病專家何大一同廣為港人認識嘅中華醫學會會長鍾南山等猛人嚟主講。但聽講首先出現豬流感確診個案嘅墨西哥決定唔派專家嚟，未知係咪要留守抗疫呢？
唔講唔知，原來李國棟當年都稱得上係神童。六七年香港暴動，父母送佢到英國讀中學，點知考入學試時，校方認為佢嘅材料應該讀中四，於是乎連跳三級；上到大學佢修讀化學，返港後再讀埋醫學，讀兩個學位都只係比平常人用多兩年咋！