立法會新丁議員初挑大樑嘅表現會係點？話說環境事務委員會主席咁啱喺呢個禮拜一請假，於是副主席陳克勤呢位新丁要處男下海，一嘗主持會議嘅滋味，秘書處特別喺會前額外提供一份「議事綱要」畀佢，即係畀張貓紙佢，避免會議程序出錯，點知克勤仔就發現大不同。
克勤仔喺網誌話，區議會或政府諮詢架構提供嘅議事綱要內容詳盡，成個會議流程好似劇本咁寫晒出嚟，相反立法會嘅綱要只係提綱挈領式，只列出會議重點同撮要內容。
好彩當日討論嘅議題爭議唔大，議員同官員又冇炒大鑊等失控場面，冇增加主持會議嘅難度，克勤仔唯一係要控制各人發言時間，喺適當時候截斷議員同官員發言。