政府啱啱公布新一屆科技大學顧問委員會成員名單,新加咗六個新成員,其中包括港交所行政總裁周文耀、滙豐銀行執行董事王冬勝,同埋合和實業集團聯席董事總經理胡文新。
今年三十六歲嘅胡文新,由兩年前開始接咗爸爸胡應湘嘅棒,同時好似承繼埋爸爸熱愛回饋社會嘅習慣,仲有青出於藍嘅趨勢添。
佢上個月先被委任做理工大學校董會成員,依家又入埋科大顧問委員會,唔止咁,鍾意玩冰球嘅佢同時又係香港體育學院董事局委員。
佢被委任嘅公職所涉獵範圍都好廣泛,除咗教育,環保、金融都有佢份,前排佢仲做埋推動使用電動車輛督導委員會嘅成員,又連任證監會諮詢委員會委員,可謂百足咁多爪。