金融管理局總裁接班人遴選工作黑箱作業，預定個位畀特首辦主任「攞命陳」陳德霖，泛民主派以涉及公眾利益為由，要求下禮拜三立法會進行休會辯論，擺明係要狙擊財爺鬍鬚曾同攞命陳。
但3L成員林健鋒尋日喺內會開腔撐政府，起初仲好似蟹咁起晒槓話好多國家嘅央行行長都唔會公開招聘，一般交由財金官員委任，所以唔存在影響政府誠信嘅問題，仲反問：「係咪吓吓要干預（政府）行政呢？」又話休會辯論一來冇討論迫切性，二來毋須經立法會討論，所以反對休會辯論。
泛民即時群起攻之，話遴選過程涉利益輸送，又批評林健鋒唔贊成休會辯論，變相封殺佢哋嘅討論。見勢色唔對，林健鋒澄清從冇用「封殺」兩字，反指泛民抹黑佢，冇言論自由。
未幾，內會主席Miriam劉健儀按鐘叫議員表決係咪贊成休會辯論，點知林健鋒即刻話：「主席，我話反對啫，但冇話要投票喎！」Miriam於是勁寸佢，話有反對意見自然要投票，好難話反對又唔使投票喎！
內會最後喺冇人反對下，決議喺下禮拜三進行休會辯論，咁即係話林健鋒最後都縮晒槓啦！