本文重點
相信大家仲記得立法會停車場早前發生交通意外，政務司司長唐唐架座駕輾過立法會保安主任隻腳，令保安主任右腳腳面骨裂，要打石膏兼住院，雖則保安主任話當時唐唐架座駕係有停車，只係佢轉身冇留意，但呢宗意外引起好多議員關注。
話說劉慧卿早前去信內會主席，要求喺立法會停車場設置減速裝置，而立法會秘書長尋日亦喺內會交代咗一啲諗法，例如擴闊停車場閘口嘅寬度，等啲車可以唔使轉急彎入嚟；又或者全日閂閘，等啲車喺閘前停車，開閘後就要減速駛入。
搬走示威區行唔通
立法會正門兩邊設有示威區，但凡立法會開大會，兩邊都會企滿示威者，有時仲企到過對面嘅遮打花園添，而內會主席劉健儀都講明當日嘅意外唔關人多嘅問題，但3L嘅林健鋒話示威人士好多，啲標語橫額掛晒出嚟，記者又行晒出車路採訪，似乎係埋怨人車爭路咁，跟住仲建議不如全面檢討吓情況。
確實係有人車爭路嘅問題，但主席都話唔關人多事咯，林健鋒嘅建議係咪有啲借題發揮呢？仲畀人覺得佢想收細個示威區添！點知話口未完，「旅遊超人」謝偉俊又建議不如將個示威區搬去皇后像廣場。吓！咁即係由立法會前門搬去後門，咁啲政府高官咪可以避開晒啲示威者囉！說罷，多名議員即刻反駁話民為貴、君為輕，應該以民為先，有乜理由要民讓官，尤其係啲高官嚟親立法會都係一人一部車駛入嚟，若果佢哋怕再有意外，倒不如行路嚟立法會，又或者幾個高官坐一架車嚟囉！咁就既環保又安全嘞！
老實講，喺三月公布財政預算案後，班高官都做過場爛騷，由立法會行路返政府總部，但只係得一日貨仔咁大把，事後仲發現佢哋啲座駕係空車駛返政府總部，佢哋邊係關注環保吖！
呢次意外係咪摑得醒佢哋咪罔顧人命安全，肯紓尊降貴行路去立法會，就要放長雙眼睇吓嘞！