觀塘寶達邨羅馬廣場中間有舊大石，表面光滑又斜斜地，成個「天然滑梯」咁，好多細路都鍾意爬上去玩。舊石頭有成三呎高，三尖八角，周圍又冇圍欄，喺上面滑落嚟，好容易會跌親。
月初，有個五歲小妹妹同媽咪喺廣場散步，睇到舊石即刻擒上去玩，點知失足跣低，撼親個頭，送去醫院縫咗四針，就算好番都可能破相，變咗高低眉。嗰度已經唔係第一次發生意外，社區人士估計，呢舊石擺咗六年，已經導致過千宗涉及小朋友嘅意外。
跌親細路不特止，有人甚至帶仔女喺度小便。羅馬廣場唔止變「攞命廣場」，仲變埋公廁添。舊危石阻頭阻勢，唔少居民都要求房署盡快搬走，等小朋友可以玩得更加安全。
屋邨休憩地點叫「羅馬廣場」，已經不倫不類啦，仲無情白事戙舊石喺正中間，房署原來想學人扮高雅，玩藝術。佢哋話舊石嚟自附近石礦場，係廣場設計一部分，除咗裝飾，亦預留畀屋邨做雕刻或者安放牌匾。不過，居民就話完全唔覺得呢舊石係藝術品。
叮！房署自己都承認，到依家都搵唔到乜嘢適合立碑誌慶或者紀念，即係話舊石擺喺度一啲意義都冇。佢哋當初為咗附庸風雅，憑空想像亂咁嚟，根本冇去諗咁做會唔會對居民帶嚟不便，對小朋友帶嚟危險。
依家跌親咁多細路仔，面對居民同輿論嘅指摘，房署居然擇惡固執，拒絕移走危石，求其搵幾盆盆栽將舊石頭圍住就算數。最搞笑就係，為咗加強「效果」，佢哋仲喺舊石上面貼咗幾張「不准攀爬」嘅告示。
叮！班官員有冇腦㗎？依家跌親嗰啲都係幾歲大嘅細路，根本連字都唔識，貼告示畀邊個睇吖？話唔埋有小朋友貪得意，見到告示就爬上去撕嚟玩，咪仲危險？房署唔諗吓問題出喺邊，以為貼咗告示就可以將責任推得一乾二淨，關人個關，完全係攞小朋友嘅安全嚟開玩笑。
公共屋邨康樂設施嚴重缺乏，細路仔冇地方玩，周圍捐以致發生意外嘅悲劇，近年多次發生。前年底，屯門蝴蝶邨一名四歲男童失足跌落屋邨廣場一個不設防嘅噴水池溺斃；舊年年中，天水圍一個屋邨有兩姊弟因為貪玩，由三十四樓屋企爬出嚟，沿水渠一路爬到二十幾樓外被困，好彩畀人救番落嚟。事後發現，嗰個屋邨啲細路冇嘢好玩，爬水渠係佢哋最喜歡嘅「遊戲」之一。
叮佢個鎯鎯！房署唔諗辦法解決屋邨康樂設施短缺問題，反而攞舊石嚟整色整水，簡直麻木不仁。既然唔肯搬走舊危石，不如索性刻上「累人累物」四個大字，畀房署署長陳鎮源反省吓，不過記住起番鐵欄杆圍住，唔好再害細路仔咯。