本文重點
【本報訊】財爺鬍鬚曾份預算案錄得歷來最多反對票，但佢不單冇好好吸取教訓，仲學埋佢老細煲呔曾啲親疏有別惡習，拒絕同投咗反對票嘅議員會面商討加碼措施。到尋日正式公布加碼方案時，又冇同時向立法會匯報，連唔少建制派議員亦大感不滿，質疑鬍鬚曾真係當佢哋係橡皮圖章，更離譜嘅係佢一方面為咗政治理由押後派糖，另一方面又要求議員火速通過呢堆遲來嘅措施，無視立法會嘅既定程序。
忽然改口 勞民傷財
中小企貸款計劃嘅政府承擔額由七成提高至八成嘅建議，業界晨早喺幾個月前已經提出，但政府一直都充耳不聞。到前日政府終於宣布肯採納，商務及經濟發展局局長Rita劉吳惠蘭，又要求跳過將建議提交相關事務委員會過冷河嘅程序，直上財委會申請撥款，變相打尖問立法會攞錢。
財委會主席劉慧卿最後以不合規程為由拒絕咗有關要求，Rita惟有改為要求工商事務委員會主席方剛，喺下周一緊急開會補做所需嘅過冷河程序，名副其實係自己攞嚟衰。
正如立法會早已完成審議預算案提出最多退稅六千蚊嘅草案，等政府落order恢復二、三讀。依家鬍鬚曾又改口加到八千蚊，立法會又要重新嚟過，又唔知要嘥多幾多時間同公帑，認真勞民傷財。