【本報訊】今日係一年一度嘅端午節，傳統梗係要食糉、睇扒龍舟同游吓龍舟水咁。尋日喺中環遇到馬會主席阿John陳祖澤，佢都話今日喺屋企食吓糉咁啦！
阿John話依家做馬會只係賽馬，冇下海扒龍舟呢支歌仔唱。佢似乎幾回味喎。梗係，佢以前做九巴董事長時，曾經做過龍頭鼓手，帶領九巴贏咗西貢龍舟競渡男女混合賽季軍添！
幾威水咁喎！咁當年扒龍舟速度有幾快？佢竟然話僅僅慢過大郵輪少少啦！
係人都知郵輪喺公海就駛得好快，但一駛入維港就變龜速，咁阿John喺香港水域內扒龍舟，咪即係蟻步囉！究竟佢係自誇定自嘲呢？
講到食糉，佢以前煮到嚟就食。咦！呢句說話聽起嚟好切合佢「橋王」嘅本色，即係無論發生乜嘢事，總之殺到嚟先算，到時總諗到橋嘅，之不過，亦都可以話佢食糉唔多揀擇嘅。
今時唔同往日，佢依家食糉必定會撇開舊肥肉先食。點解？好易理解啫！有番咁上下年紀，食得太肥膩，對身體都唔多好，都係少食為佳。