本文重點
【本報訊】乜嘢叫禍從口出？有辦你睇，咪就係搞爛Gag搞出禍嘅林健鋒囉，早前因為佢同梁君彥喺傳媒面前，戲言商務及經濟發展局前局長馬時亨同前經濟發展及勞工局局長葉澍堃會做「3L」嘅高層，激到肥亨同葉澍堃齊齊要出嚟澄清，肥亨仲省咗林健鋒一鑊，但早前擺嘅和頭酒，肥亨餘怒未消，仲寸爆佢出氣添！
林健鋒繼續搞爛Gag
尋日撞到林健鋒，問起和頭酒當晚肥亨唔肯收佢張遺囑當薪金喎！佢仍然死性不改，繼續搞爛Gag，話不如畀孖辮遺囑、地中海遺囑囉，任肥亨揀咁話。因住又玩出火喎？
肥亨嗰筆係咪算數未知，但林健鋒冇提及擺平咗葉澍堃未喎！但佢就拎番兩年前去內地荔枝團葉澍堃打麻雀嘅事來講。講埋啲陳年舊事，唔通想證明大家係「真正朋友」？
林健鋒話當日同枱雀戰嘅仲有3L另一成員梁君彥同貿易發展局總裁林天福，雖然唔係打得好大，只係一、兩蚊番，但佢竟然食咗海底撈月、清一色萬子，大殺三方。
葉澍堃仲憶述當日點都諗唔到打台灣牌都會做清一色，因為做得牌嚟都畀人食咗胡啦，但偏偏有人向難度挑戰，贏咗八十幾番，仲再嚟兩鋪自摸，搞到葉澍堃都要嘆句「盲拳打死老師傅！」正所謂旺開有條路，佢都心知不妙，擔心繼續磨爛蓆只會愈輸愈多，好彩喺呢個時候有個人走埋嚟，叫佢哋去消夜！
嗰個打救葉澍堃等人嘅係邊個？竟然咁有江湖地位，叫佢哋收枱就聽晒話即刻收？之唔係長江製衣創辦人兼慈善家陳瑞球囉！
真係多得球伯及時出嚟叫停，打救咗葉澍堃，仲斷咗林健鋒條財路添！否則當日佢可能畀林健鋒斬到一頸血！