呢次建築署冇錯係快快手整咗份報告出嚟，之不過鬼鬼祟祟唔想公開，如果唔係輿論以及死者家屬狂炳，呢份「鐵閘殺人事件」調查報告撮要都幾難曝光。
查實建築署署長余熾鏗都唔使咁騰雞，成份報告語焉不詳，來來去去三幅被，一味話建築署多次視察該鐵閘，冇發現鐵閘操作上有唔妥，只係重咗啲咁話。而比較令人關注嘅，就係調查報告解答咗殺人鐵閘原定喺今年二月更換，但最後又冇換到嘅原因。
原因好簡單，由於官員過農曆新年大晒，而且工程又話冇迫切性，就咁一拖再拖，本來排期本月十六日更換，點知未換已出事。
叮佢個鎯鎯，成份報告廢到無倫，既冇交代部門點樣檢查，又冇講點解要換鐵閘，最弊係政府仲死撐，聲稱直至事發前鐵閘都冇問題。女死者家屬梗係唔滿意呢份咁嘅報告啦，怒斥政府講大話：「如果道閘冇唔妥，點解會冧落嚟？」
照咁講，唔好話太一叮靠嚇，建築署雖然話全港大大小小嘅政府大廈鐵閘運作正常，信佢就真係搵條命仔較飛，一個唔好彩又冧閘，入去政府大廈交稅、交牌費冇咗條命，你話幾無辜呢。
話時話，建築署有幾官僚，喺業界已經響晒朵。有外判工人話，建築署依家審批一啲冇納入政府清單嘅建築物料時，要經N個部門審批，手續繁複到痹。
最離譜嘅係，建築署成日話冇即時危險就唔處理，一味靠拖，難怪呢個鐵閘工程一拖再拖，唔死人都唔做嘢！呢嗱，本來要排期半年，但死咗人之後三日即刻換到，證明佢哋非不能也，實不為也。
其實，呢單冧閘殺人慘劇根本唔係意外，好明顯係有人失職啦。三歲細路仔都知，完全因為建築署官員闊佬懶理、當危機冇到，先至搞出人命。最弊係劑劑慘劇過後，當局至整色整水搞吓調查、交吓報告，你以為佢哋真係想搵出原因，捉條友出嚟受靶咩？唔使旨意呀！
好似話赤柱冧樹壓死港大女生慘劇吖，死因庭裁定係一樁可以避免嘅意外，弊在死因庭只係負責調查死因，唔係追究責任，所以最後又係冇任何官員要負責，事件不了了之，淨係搵政務司司長唐英年做管樹大隊長做騷就算。
呢次鐵閘壓死清潔女工慘劇，幾乎就係赤柱冧樹嘅翻版，只不過係由棵枯樹變成二百磅重嘅大鐵閘，本來又係可以避免嘅意外，問題係，唔使死因庭裁定都知，例牌又係冇人要負責任！
聽聞余熾鏗就快退休咬長糧，太一叮想問聲佢，聽到死者家屬聲淚俱下嘅哭訴，唔通佢真係毫無感覺？