政府早幾日宣布咗金管局總裁任志剛十月一日離任嘅消息，被喻為香港金融沙皇嘅佢亦開始踏入告別期，啱啱過去嘅周四（二十一日）及周五（二十二日），佢仍然要出席立法會兩個會議，咁啱得咁蹺，佢都係會後約咗太太葉小慧去拍拖食飯兼行街，好似借同太太拍拖嘅機會嚟減壓咁。
上星期四嗰日，佢朝早去立法會匯報金管局嘅投資，會後，佢就約咗太太去香港會食午飯，當時見佢心情靚靚，同太太笑容一致，我哋問佢退休後有乜安排，佢笑而不答。
第二日朝早，佢又要去立法會出席雷曼小組聆訊，雖然議員爭相批評佢包庇銀行，公眾席上更有雷曼苦主高聲打斷佢嘅發言，但任總一啲都冇受影響，傍晚六點半左右，打工仔紛紛放工，任總夫婦又出現喺金管局大本營樓下嘅IFC商場，今次佢哋就係逛公司，任總見到傳媒都揮手打招呼，同太太有講有笑，不知幾冧！