千億爭產官司引起全城矚目，最好睇嘅莫過於揭露大富之家玩風水術數，貴為行政會議成員嘅新界王劉皇發話自己都信風水之說，但絕唔係人哋話乜就信乜，佢仲話，計劃去北京搵個風水大師學嘢添。
發叔成日以鄉下人自居，亦好遵守鄉村嘅傳統，鄉議局喺沙田石門興建新大樓時，佢哋都有邀請風水師到場燒陰契及擇日動土，以求開工大吉、風調雨順。其實，新界好多鄉民都篤信風水，唔少基建大計更畀佢哋以擔心風水被破壞提出反對，問到發叔點樣處理呢啲問題時，佢諗咗一陣，然後慢條斯理話，風水嘅嘢，唔係人哋講乜就信乜嘅，自己都要仔細分析㗎嘛，起碼諗吓有無道理，無道理就要據理力爭。
又係嘅，篤信風水玄學嘅人，好容易成為俗語所講「風水佬呃你十年八年」嘅人辦，只想風生水起、但又唔慎思慎行嘅話，真係好容易畀人呃到氹氹轉。或者係咁，發叔都有意學吓風水之道，佢話，計劃上北京搵個風水大師學風水，增加個人風水知識。
不過，佢都補充，家吓十畫沒有一撇，亦未諗掂搵乜嘢高人指教，一切有待安排喎。