新一屆立法會唔經唔覺已經運作八個零月，做多兩個月就要放暑假，回顧議員嘅工作表現，出席率暫時計唔到數，但議員逢周三嘅質詢都有啲睇頭，事關幾個議會新丁不約而同爭做「問題王」，結果陳克勤同Starry李慧琼成功挑戰民協馮檢基同身兼行會成員嘅劉江華，期內提出嘅質詢達十七條。
至於問題王第二位就有四個，當中又有兩個議會新丁，包括白鴿黨嘅甘乃威同旅遊界嘅阿Paul謝偉俊，阿Paul提問之多更係功能界別少數嘅一個；另外兩人就係平日比較低調嘅衞生服務界李國麟同鄉議局副主席張學明，真係有啲出人意表。
讚完啲最勤力提問嘅議員，又係時候要彈吓啲立會大懶蟲。金融服務界詹培忠同中總黃宜弘再次錄得零質詢，體育界霍震霆、工總梁君彥同資訊科技界譚偉豪亦只問過一條問題，到底係功能界別議員問題少，定係佢哋個人問題呢？