自由黨勢力喺香港總商會選舉失利後，前主席田北俊日前對富貴黨成日上街示威，罵業主加租、銀行無良有微言，認為黨有必要喺大財團同中小企間取得平衡。尋日富貴黨一眾齊齊亮相，主席劉健儀（Miriam）、副主席方剛同張宇人及田少更同場出現，不過，Miriam同方剛對未來路線嘅睇法同田少都有出入，似乎佢哋內部對田少嘅建議都未有共識。
Miriam話，黨嘅「中間偏右」嘅路線不變，希望代表包括大、中、小企嘅商界，不過會檢討表達手法，咁佢點睇田少喺總商會低票當選？Miriam直話直說：「當選如何同自由黨無直接關係，今次選舉自由黨無參與。」方剛都話，佢哋係對事唔對人，如果業主加租加得太離譜，銀行唔放錢影響中小企生存，就梗係要出聲啦，絕對唔影響黨路線咁話。