本文重點
中學教學語言微調方案諮詢多時，教育局打算喺六月內最後定稿，畀全港中學作準備及人手配備，以便微調政策喺明年九月正式推行。不過，臨近六月，教育界對微調政策卻頻現暗湧，語常會主席田北辰連日來高調攔阻，話政策將令香港學生「英不成、中不就」，教師工會又揚言不惜抗爭要求當局暫緩實施微調政策。教育局局長孫明揚衝門一刻先遇到咁多人拉衫翹腳，呢次真係考完腳法，又考耐力，少啲功夫都唔得！
為咗呢次攔截，田二少可以講係既花心機又花錢，日前先揼咗筆一個打工仔成個月人工嘅錢出嚟，搵大學幫手做家長對微調政策嘅調查，之後高調舉行記者會，又約見孫公，希望政府暫緩一年實施微調，可惜孫公對佢嘅努力只係畀咗句「多謝你嘅好意！」仲話，微調方案已經勢在必行。
教師憂工作量大增
一招不果，田二少尋日又寫咗篇《香港家書》，文內對微調方案多多怨言，批評政府對母語教育放軟手腳，推個微調政策出嚟勢必令香港教育界重返上世紀八、九十年代、即「校本自決」嘅放任狀況，推行嘅教育只係非驢非馬嘅「港式英語教學」。田二少好憂慮咁話，此舉只會令到本港下一代「英不成、中不就」。佢仲斥責，香港有短路唔行，偏偏揀咗行長路，走上波士頓推行英語及拉丁語教學失敗之路。
佢鬧得雖然好狠，但孫公嘅態度亦一樣咁硬，講到明呢個政策勢在必行，曾經同田二少一齊做教統會專責小組嘅中學校長戴希立都認為，家吓反對微調政策已冇乜意義。但田二少都有啲同路人嘅，因前線教師都擔心落實微調方案後，現有教師工作量大增，現有人手未必可以應付雙語教育嘅挑戰，所以亦支持當局暫緩執行。