雖然俗語有云「人生七十古來稀」，但隨着醫療科技進步及食物營養不斷提高，活到七十歲已不稀奇，而且還可以很健康。老人科專科醫生佘達明指出，長者在患病或有需要時，亦可以接受有風險的手術，但他亦指出，長者「後備力量」不及年輕人，故應盡可能避免接受有風險的檢查。
他說:「長者外表唔一定老，但係佢哋內臟器官嘅機能，始終無年輕人咁好，就好似五十歲嘅人接受通波仔手術，可能每一百位少於一位會有事，但七十五歲以上長者，就會增加至一百位有兩至三位有問題，所以就算係低風險檢查，對長者也有一定風險。」
此外，佘醫生說：「當患病時，唔做手術就會死，醫生喺利益大過風險嘅原則下，一般會建議病人接受手術，就算病人係長者都會作出呢個決定。」但佘醫生又指出，長者病人應該避免接受有風險的檢查，即使要接受手術，也應以微創手術代替開刀。