東亞運動會年底喺本港舉行，港府平時唔關心體育發展，所有嘢都係臨急抱佛腳，籌備工作唔止時間緊，更加「水緊」，嗌晒救命。照講，呢場「體育盛事」係政府要搞嘅，佢哋應該自己泵水搞番掂至正路吖。
民政事務局話冇有怕，仲主動出擊周圍「撲水」添，而且好快就話搞掂咗。仲以為政府搵啲「大水喉」射住，點知佢哋原來係向慈善團體埋手。呢嗱，負責黃大仙祠管理嘅嗇色園就做咗老襯嘞。佢哋早排收到當局贊助東亞運嘅要求，既然政府出到聲要支持本港舉辦大型活動，梗係要磅水啦。於是就畀咗兩百萬，換咗個銀贊助機構嘅「榮銜」。
叮！唔該民政事務局局長曾德成搞清楚，黃大仙慈善為懷，雖然資源有限，對需要幫助嘅貧困人士從來有求必應，為佢哋雪中送炭；東亞運動會講得唔好聽，不過係幫政府貼金嘅形象工程，所謂贊助不過係錦上添花。
有限嘅資源如果使用不當亂咁Fing，對弱勢社群嘅支援必然受到影響。呢場金融海嘯，受衝擊最大、生活質素惡化得最快嘅就係班貧困人士。學立法會議員王國興話齋，民間慈善團體唔係好富有，啲錢主要用嚟做慈善工作，政府問佢哋攞錢，其實係分薄善款，與民爭利。
叮！依家咁嘅環境，個個連自己都顧唔掂，慈善團體收到嘅善款不斷減少，有人估計，今年市民捐款可能會少一半，「捐情告急」，但需要援助嘅市民不斷增加，未來嘅服務可能因為經費唔夠要縮減。政府呢個時候仲唔理好醜亂揼心口，搵慈善團體贊助東亞運，咁同間接喺乞兒兜度搶飯食有乜分別？
有樣嘢仲扯火，澳門早幾年同樣係主辦東亞運，總開支四十億，起咗九個大型場館。賽後啲場館主辦咗幾個大型國際賽事，帶旺埋旅遊業。澳門搞到有聲有色，已經珠玉在前。
但港府淨係識諗縮數，總預算得嗰二億四千萬，仲係政府只出一半，其餘靠集資。比賽場地起好嘅就寒寒酸酸，只屬「蚊型」國際級水平；有啲就起到唔湯唔水，好似射擊場工程咁，仲搞到要爛尾。
叮！人搞東亞運，香港又搞東亞運，點解喺澳門搞就個個拍爛手掌，喺香港就搞到咁兒戲？梗係啦，港府根本冇心發展體育，主辦東亞運，不過係場形象騷。做起嘢嚟，諗住慳得就慳，樣樣算死草，咪搞到一鑊泡囉。
區區嗰兩百萬，求其搵個大財團搞掂，有幾難吖？再唔係，班高官減少少人工都夠啃有餘啦。財雄勢大嘅政府居然要靠黃大仙救苦救難嘅善款去搞東亞運，等於財主佬搶窮人嘅錢去為自己開派對，真羞家！