本文重點
金管局總裁任志剛退休，議員最關注嘅係繼任人選同聘任程序，或者講得白啲，其實係睇唔過眼煲呔曾隻手遮天、任人唯親，欽點佢嘅家臣特首辦主任「攞命陳」陳德霖出任呢個全球最高薪嘅央行行長職位。
唔單止泛民主派，就連建制派嘅富貴黨主席劉健儀、工聯會潘佩璆，以至身兼行政會議成員、建仔嘅劉江華，都認為呢個咁高薪同重要嘅職位，冇理由唔使公開招聘，即使明知煲呔曾最後點都會揀番攞命陳，都冇理由連個樣都唔做吓，否則好難向啲寄咗過百封求職信都搵唔到工嘅基層失業市民交代。
任人唯親等同瀆職
白鴿黨李永達仲誇張，為求博出位同爭曝光，一開波就去到最盡，話如果煲呔曾拒就該職位進行公開招聘，佢會考慮引用《基本法》賦予立法會嘅尚方寶劍，以煲呔曾任人唯親等同瀆職為由，動議啟動彈劾特首機制。根據有關條文，動議只須全體議員當中嘅四分一聯合提出，即係白鴿黨、公文袋，再加多一名泛民議員聯手就夠票玩嘢。
雖然動議需要先後取得過半數同三分二議員支持，先可以正式將煲呔曾炒魷，預料最終通過嘅機會極微，但最少可以令到煲呔曾成為香港歷史上首位面臨立法會彈劾嘅特首。