金融海嘯打沉全球經濟，香港廠商會尋日公布珠三角港商首季經營狀況調查結果，會長尹德勝仲估計豬流感殺到，港商生意隨時跌多一至兩成。
港商難撈，副會長李秀恆(圖)心中有火，要求特區政府為營商環境拆牆鬆綁，仲爆廠商會想搞會所製造就業，都畀政府阻頭阻勢。說罷，連廠商會行政總裁梁世華都打個突，補飛話會所嘅轉地契手續政府已經批咗，只係廠商會未拍板係咪落實計劃啫。兩人各有各講，撲朔迷離。
尹會長話舊年有會董建議喺廠商會大廈二十六樓搞間會所，轉地契手續都搞妥，點知金融海嘯突然殺到，搞食肆風險大，咪叫停先囉。即係唔關政府事。點解李秀恆咁扯火呢？尹會長話可能同李秀恆有農圃飯店股份有關。係喎！搞食肆，政府規限多多，做老闆嘅係勞氣啲喇。