前晚香港總商會選理事會爆角力戰，富貴黨被排擠，政壇暗湧四起。富貴黨副主席「肥仔張」張宇人尋日話個黨以後搣甩大財團黨標籤，包袱輕咗，計落冇乜損失，反而總商會冇咗富貴黨，喺立法會就只得番一票，影響力肯定大減，前晚總商會排斥中小企，令富貴黨支持嘅人落敗，仲隨時激起中小企退會潮添！
總商會嗰票咪就係畀咗退出富貴黨、3L嘅林健鋒囉！肥仔張話裕華國貨嘅余鵬春爭贏入總商會理事會，田北俊小輸一仗，但林健鋒都唔好得去邊，事關余鵬春
咗總商會立法會代表個位好耐，加埋早已蠢蠢欲動嘅李大壯，林健鋒下屆冧莊唔容易。肥仔張擺明係寸林健鋒未必坐得穩喎！
林健鋒唔肯評論總商會係咪處心積慮清洗富貴黨勢力，反寸有人話總商會排斥中小企係搞分化；對於余鵬春威脅論，佢就話從來都冇聽過喎，指呢啲係冇根據嘅事實。
呢排林健鋒認真惹火，有傳近日佢擺前高官葉澍堃同馬時亨上枱，話佢哋將分別出任3L嘅主席同行政總裁，據聞佢即時補鑊，前晚急急搵肥亨食飯「沙冧」，但林健鋒就否認擺「和頭酒」，話同肥亨係老友，請對方食飯冇乜咁奇。