本文重點
有文化界人士早幾日喺大氣電波聲討西九文化區管理局，直指政府過橋抽板，氹咗立法會通過撥款二百幾億元後，對文化界就不瞅不睬。言猶在耳，近日有消息話西九管理局行政總監人選已經敲定，仲會喺下個月初返工。咦！咁係咪代表有偈傾呢？
呢位西九「二哥」係乜水？聽聞係洋名「Angus」嘅鄭肇川，冇乜人識，亦唔係文化界人士，佢早年參與過發展法國迪士尼樂園，後來做埋香港迪士尼幻想工程師，到近年先加入前地鐵公司做總經理，主力做物業投資，最近一份工就係做投資銀行。
雖則佢有做過迪士尼，但迪士尼呢幾年搞成點大家有眼睇；仲有就係近年佢做物業投資，呢個冇文化底嘅人點樣去構建一個文化區？本來已經冇共同語言，文化人仲擔心係似地產佬嘅Angus管理下，西九會變成空有幾座大型建築物嘅大白象。當地產佬Vs文化人，可以想像會點，咪十足火星撞地球囉！
擁豐富發展大型項目經驗
不過有人認為Angus有豐富嘅發展大型項目經驗，將來要靠佢同政府交手，而管理局亦唔係由行政總監玩晒，將來有行政總裁揸主意，所以唔使太擔心。
其實，西九管理局都知道文化界好想有say，亦估計到有啲乜嘢反應，搵邊個做行政總監都會有質疑。據聞人選已經簽咗約，管理局亦有部署，將喺本月二十二號公布整個行政架構，包括行政總監、十個高級職員同七十至八十個普通職員，等公眾清楚佢哋嘅職能，而行政總監人選，聽聞喺二十九號公布。消息人士形容行政架構係一個樹林，而行政總監只係其中一棵樹，文化界可以先睇清楚整個樹林嘅分布，先去評價呢個年薪逾百五萬嘅行政總監係咪適合。
既然咁有部署，睇嚟呢位準行政總監已經度好晒橋，準備好到時點同班文化人過招。