「東方報業民意調查」真係有心，將周一鑊的「廢噏語錄」列舉出來，睇怕佢唔膺「廢話之王」都唔得啦！周一鑊語無倫次，七句中我選呢句為「廢噏之王」：「隔離初期難免有『甩漏』，但隔離第二、三日，開始了解到唔同國家旅客要求，甚至提供啤酒，之後旅客就開心咗好多。」
周先生，如果提供法國紅酒，再提供十頭日本吉品鮑，啲旅客肯定唔止「開心咗好多」，直情瘋狂咗好多，並自動要求加碼：隔離多七七四十九日！到時你老哥嘅民望肯定如斷線紙鳶，直飛外太空！
仍有豬流感患者過關，反映口岸防疫措施失效！暑期將至，美、加、澳等疫情高危國的留學生陸續回港，一旦有「甩漏」，喺社區爆發就唔係咁易執生！香港唯一可以做的，就係登機檢疫，周一鑊卻堅拒這個最有效的防線，情願越俎代庖，指美國政府要管好流感患者！難怪周一鑊管轄下的醫院經常出事，藥物及食物亦頻頻出問題。
周一鑊另一則「廢噏語錄」亦算經典：「美國已放棄口岸戰線，無法防止社區蔓延，只可減慢蔓延速度；如果香港有本土個案，又追蹤唔到源頭，唔排除採用美國做法。」流感爆發，速度之快，常令人措手不及，日本的疫情一天失控，便是活生生的例子，未知周一鑊是否懂魔法、識妖術？否則疫症殺到，如何「減慢蔓延速度」，筆者願聞其詳。周一鑊對「通識」的認知，與一些中學生的「吹水」論分別不大！
孫悟空曾向觀音說，他保護唐三藏去取經，不為別的，只指望「歸真正果，洗孽除邪」，這是老孫的心意。我們寄望周一鑊把關，當然不能視他為孫悟空，香港要「歸真正果，洗孽除邪」，筆者信有求必應的黃大仙！有道是：人之所以迷信，只是由於恐懼。港府出了那麼多廢話王，唔驚就假咯！