呢嗱，本報委託顧問公司測試七個地點嘅空氣質素，包括交通交匯處、商場、港鐵站以及巴士車廂等，發覺好多地方嘅空氣質素都勁唔得。以連接藍田港鐵站嘅交通交匯處為例，唔量度猶自可，一量度就嚇死人！
短短十分鐘之嘛，居然量度到每公升有差唔多五十萬粒懸浮粒子，最高有成六十萬粒，污染物當中有細菌、病毒、霉菌。根據歐洲國家標準，超過三十萬粒懸浮粒子，已經達到「不適宜逗留」水平，唔信邪嘅咪試吓逗留耐啲，呼吸道敏感、哮喘病隨時乜都引發出嚟。
室外係咁，室內嘅空氣質素都唔好得幾多。調查發現，有兩個商場內嘅二氧化碳濃度偏高，平均濃度超出咗環保署指引嘅「良好級別」水平，即係表示商場通風率偏低、空氣中嘅污染物開始積聚。
理工大學屋宇設備工程學系助理教授梅國威博士表示，流感病毒可以黐住懸浮粒子喺空氣中飄浮傳播，二氧化碳濃度代表室內空氣流動情況，如果抽風系統不足，會令到懸浮粒子濃度增高，細菌喺空氣中停留嘅時間就會更耐，增加咗人類受感染嘅機會。
傳染病科醫生亦表示空氣唔流通係流感傳播嘅大忌。如果豬流感疫潮喺社區爆發，容乜易一傳十、十傳百咁傳播開去，搞隻超級惡菌出嚟都唔定㗎，咁就弊弊都冇咁弊！
咁到底環保署做咗啲乜呢？原來環保署只係話提醒一下物業管理公司以及商會注意室內空氣質素就算。叮！太一叮成日夠喺度提醒環境局局長邱騰華做嘢㗎啦，有邊次佢唔係當耳邊風㗎？
叮佢個鎯鎯，成班環保高官講就天下無敵，做就有心無力。電廠排放、汽車廢氣等等嘅污染源頭就闊佬懶理，平時唔係用公家電腦睇鹹網解悶，就係度埋啲「停車熄匙」超現實屎橋出嚟。
不過近排邱騰華改咗做「電車男」，出盡飲奶之力宣傳電動車大計，之但係成個計劃認真得啖笑。車價唔單止貴到嘔，出到街又冇叉用，想搵地方叉電都幾難，據講電池要成五萬大元，用五年又話要換，點吸引到人用吖？
冇錯，電動車行駛嗰時的而且確係冇廢氣，但太一叮好想問吓邱騰華：「電從何來？」小學生都識答電廠啦！講到尾，咪又係將排放廢氣嘅罪名過咗畀電廠之嘛，煙囪咪又喺度猛咁噴煙！
叮佢個鎯鎯，咁惡劣嘅空氣質素，唔單止嚴重影響香港人嘅健康，好多旅客見香港空氣灰蒙蒙都唔敢嚟，搞到香港蒙受難以估計嘅經濟損失。金融海嘯已經打殘香港旅遊業，加埋豬流感夾擊，業界擔心未來兩個月行內一半從業員、約二萬五千個員工隨時冇工開。
邱騰華唔好兩頭望啦！香港空氣質素愈差，太一叮嘅谷氣指數就愈爆晒燈！閒話少說，一於叮爆佢個鎯鎯！