喺金融海嘯衝擊下，銀行落雨收遮，收緊信貸，搞到好多中小企嗌晒救命，而政府推出嘅吊命措施中小企信貸保證計劃同千億元特別信貸保證計劃，究竟幫到幾多？
立法會工商事務委員會尋日討論呢兩項計劃，政府高官話過去半年已批出近九千宗申請，保證額涉及一百八十一億元。講到好似幫咗中小企好多咁，但進出口界嘅議員兼委員會副主席「象哥」黃定光就「眾人皆醉我獨醒」，質疑政府批出每宗申請信貸額較小，指兩項計劃每宗保證額分別只得三十萬同十八萬元。
在場嘅商務及經濟發展局常秘蔡瑩璧就重申，當局批出每宗信貸保證額高達一百九十萬至二百萬元。委員會主席方剛聽到個數，都質疑象哥話：「係咪計錯數呀？計少咗個零喇？」
象哥於是面懵懵攞個計算機出嚟篤兩篤，然後恍然大悟話：「係喎！計少咗個零！」象哥都係生意人，對數字應該好敏感，竟然計少個零，須知差之毫釐，謬以千里，一個零可以係百萬、千萬甚至億萬㗎，呢次佢真係老貓燒鬚咯！