新界鄉議局位於沙田石門新大樓，首階段辦公大樓正火速興建，料明年底前竣工，即係班鄉紳一年後就由九龍塘搬入沙田開會，但尋日鄉議局執委會有項臨時動議，建議改善現址嘅主席室、辦事處接待室、秘書處同廁所環境衞生等，預計要二十萬元，何解臨搬前仲要搞裝修同衞生呢？
局方總務及財務委員會主任鍾偉平話，好多高官出席鄉議局會議前，都會先到接待室或主席室等候，由於局內設施日漸陳舊，所以有需要改善。但鄉議局仲有一年就搬新屋，單純為咗啲高官嚟坐一坐而使咁大筆錢，值唔值真係見仁見智！講到搞衞生，請個清潔工人咪仲慳皮。
早前慶祝主席劉皇發榮任行會成員嘅萬人盆菜宴，扣除開支後有近十六萬結餘撥入鄉議局基金，賺到都唔夠貼裝修費喎！