利希慎家族係本港望族之一，而利希慎孫女、利銘澤女兒利德蕙尋日由加國重臨香江，為佢親筆寫嘅《利希慎家族歷史》舉行記者會，順便分享吓鮮為人知嘅家族發迹史。
六十八歲嘅利德蕙來頭唔小，係加國首位華裔國會參議員，老公伍衛權就係加國前總督伍冰枝嘅哥哥。咪睇佢係金枝玉葉，坦言喺加國生咗三個仔後堅持唔請工人湊仔，自己一腳踢，一有時間就重返校園讀書，後尾仲攞埋個多倫多大學歷史學博士學位，閒來為家族寫歷史書，今次係佢第四本書嘞。
至於利希慎當年曾創辦裕盛行販賣鴉片，有傳媒追問佢點睇呢段家族歷史，佢話當年上流社會流行食鴉片，爺爺都食埋一份，但嗰陣賣鴉片係領正牌，冇犯法，仲話爺爺為咗鴉片生意同人打官司，懷疑因此招致殺身之禍，講起佢都好傷感喎。