香港總商會尋日換領導層,戲肉原本係富貴黨前主席田北俊同全國政協常委陳永棋暗中較勁,互撐新人角逐理事會,點知場戲愈夜愈震撼!
田少唔止支持嘅人落敗,黨友楊國琦更被突襲,失落總商會副主席位置,取而代之嘅,正係同田少有過過節嘅港鐵行政總裁周松崗,富貴黨喺總商會內形勢告急。
而陳永棋就笑住口做解畫人,指選舉意義好重大,反映總商會內嘅政黨勢力消退,一夜變天。
總商會突然風雲變色,田少冷靜落嚟,夜晚對本報話咁多年嚟,總商會一直咁威,係四大商會之首,某程度因為以前有富貴黨立法會十票撐住,而富貴黨做嘢就要下下顧住總商會嘅立場,蝕凸畀總商會,經過尋晚一役,好嘞,富貴黨以後唔再有總商會呢個包袱,可以輕身上路。
不過,陳永棋玩預言,田少不甘示弱,預言總商會嘅社會影響力,肯定會愈嚟愈縮。