本文重點
香港最老牌嘅工會——工聯會，早前領導層換屆，選咗個只有三十九歲嘅吳秋北做理事長，外界都嘖嘖稱奇，而傳媒覺得最奇嘅係佢唔多放膽講嘢，變咗「吳talk得」，但talk開嘅話，發現佢都幾搞笑。
外界知道佢最多嘅係花名，啲兄弟封咗佢做工聯會「吳啟華」，但佢好似有啲抗拒，仲話驚吳啟華唔鍾意。其實，唔少人私底下都叫吳秋北做「唔揪得」，只不過唔敢宣之於口，反而佢好坦白話自細都好瘦，所以「唔揪得」畀人由細叫到大咯。
自嘲「石頭爆出嚟」
問起換屆前冇乜人識得佢，點解又上到位？估吓呢個新揸fit人點答，竟然係「石頭爆出嚟」。唔通係一朝得志，語無倫次？咁又唔係，佢只係講笑啫！跟住佢亦承認無論歷練、遠見、資歷同啲前輩冇得比，仲有好多嘢要跟啲前輩學嘅。
據聞都係多得啲隱形元老撐，睇中佢夠後生，工聯會要參政嘅話，可以有排揪啫！而首仗佢就揪低唔少老前輩。
唔揪得都不諱言，加入工聯會十年，愈踩愈深，要為勞工基層嘅公平發聲。咁工聯會通過成立政務委員會，將會催谷區議會同立法會選舉，咁呢位被悉心培養嘅新星又點睇呢？佢話只要工聯會唔係為政治而政治，撈政治油水，而係為爭取勞工權益，佢係唔抗拒政治。
老實講，佢唔少前輩亦有出戰立法會，好似前任理事長黃國健亦喺舊年九月循九龍東直選進身立法會，可見唔揪得未來都會行呢條路，所以飲咗十年工聯會奶水嘅唔揪得未來嗰幾年肯定會被催谷食大力菜，變成大力水手咁揪得，出征立法會同對手揪過。
但未出去同人揪之前，佢梗係要省靚招牌先，例如要壯大工會，依家有三十二萬四千會員，今年要增至三十四萬，到二○一○年就去到三十五萬，仲會開拓多啲屬會，有強大嘅後盾先有力同人揪。