唔講仲以為食環署署長卓永興嘅手下今次捉到個十惡不赦嘅江洋大盜添，點知原來只不過係一個喺中環擺檔十六年、年逾七十嘅擦鞋匠李伯。
唔知係咪食環署人員成日喺冷氣房蛇王蛇得多，冷氣吹到咁鬼冷血？呢個阿伯咁多年來一直拒領綜援，憑一雙手堅持自力更生，靠住微薄嘅收入養活自己兼照顧埋患病嘅老伴。畀條生路行吓都得啩？
阿伯呢次被食環署票控阻街，手作仔手停口停，就算明知有班惡吏打橫行，佢第二日都繼續擺檔維生。但呢班食環署人員死都唔肯放過佢，晨早部署人手喺附近埋伏，見李伯替人擦鞋時，一嘢撲出將佢拘捕。
今次除咗告阻街，再加控多一項非法經營罪名兼充公謀生用嘅鞋箱，販管隊人員仲加送多句涼薄說話：「阿伯你冇錢可以向政府攞綜援，總之以後唔可以再擺檔。」
叮佢個鎯鎯，真係天怒人怨呀！連附近嘅熟客都撐佢冇阻街，亦冇影響公眾衞生，唔明點解要趕盡殺絕，熟客自發聯署求情信，希望法庭可以從輕發落。
官老爺雖然輕判罰款四百元，不過拒絕發還被充公嘅鞋箱。呢幾百蚊對於卓永興嚟講，可能飲餐茶都唔夠，但已經係李伯擦十幾對鞋嘅血汗錢嚟㗎，陰功！
話時話，呢班熟客嘅心地雖然好好，但太一叮就勸佢哋唔好咁多事，食環署人員唔係人咁品，免得一個唔高興畀人當賊辦。
呢嗱，試過有市民見到做持牌流動小販嘅朋友同食環署人員理論，上前要求食環署職員出示證件，勢估唔到對方惡人先告狀，屈佢阻礙公職人員執行職務，雖然最後打得甩，但已經搞到成頭煙。
事實上，李伯只不過匿埋一個角落幫人擦鞋，如果講阻街嘅，擺到通街都係嘅易拉架咪仲阻街，又唔見食環署人員咁威猛，搵架豬籠車捉晒啲街頭推銷員返去？
叮！食環署向來都係欺善怕惡㗎啦，見到老人家開檔就冇情講，睇吓上水區好多商場外面，咪一樣聚滿晒大批小販，食環署人員眼尾都唔敢望一下，莫講話拉人充公貨物吖，連巡邏都好少見。
最弊係食環署應管唔管，依家走私蔬菜賣到成行成市扮冇嘢，後巷污糟邋遢傳播惡菌病毒當見唔到，泳池有浮金影響衞生又唔理，問題飯盒周街賣梗係當冇事發生啦！
卓永興，請問你係咪發雞盲㗎？係嘅話，最好Check吓係咪有傳染性好喎，如果唔係，點會成個食環署由上至下都選擇性發雞盲嘅呢？
家陣經濟不景，個個搵食艱難，喺呢個關鍵時刻，法律不外乎人情，係咪應該因應時勢開設小販專區以及加快開放小販牌照，鼓勵多啲小市民自力更生渡過難關？唔好淨係識得告人阻街，逼到小市民走投無路。
不過如果講阻，天下間冇嘢夠卓永興咁阻住個地球轉。好嘞，唔好再嘥太一叮時間，唔該自動自覺企出嚟受叮啦！叮！