近日城中名人都趕住撲飛，睇乜嘢？咪就係風靡全球嘅音樂劇《CATS》囉！正如「機器大王」蔣震個女阿Ann蔣麗芸早幾日就同老公Raymond齊齊入場，阿Ann仲自爆張飛唔使錢，皆因係佢牛一，有老公請喎。
阿Ann話人大咗，唔再鍾意慶祝生日，費事畀人知佢大一年又老一年，所以今年生日寧願揀同老公過二人世界，手拖手睇齣好劇。Raymond一向體貼老婆，問佢送乜禮物畀太太，阿Ann竟怕醜話：「呢個係兩公婆之間嘅秘密，點話得畀人知㗎！」
同場仲見到恒生女大班梁高美懿同老公，原來梁太係《CATS》嘅粉絲，喺英國欣賞過一次，今次《CATS》訪港，決定添食，難得佢老公樂意做觀音兵陪伴左右，女強人都變得小鳥依人。
