本文重點
日本係港人嘅旅遊熱點，但近日豬流感（H1N1甲型流感）喺日本社區大爆發，連旅遊發展局主席田北俊都大嘆近期訪港嘅日本旅客數目較舊年同期大跌三成，可見問題非常嚴重！田少話事關冇病徵嘅人都可以傳播病毒，令唔少飛機乘客擔心會喺機上感染。
雖然疫症肆虐，但田少一早計劃好下個月同太太去歐洲參加郵輪之旅。歐美都係豬流感嘅高危地喎！但田少非常老定，笑笑口咁話佢多數坐頭等或者商務客位，嗰度人少之餘座位又闊落，所以冇所謂啦！仲自爆前幾日佢去國際金融中心睇新上畫嘅西片《天使與魔鬼》，咪一樣冇戴口罩！聽佢口脗，真係冇有怕喎！
乜坐頭等染疫機會就會微啲嘅咩？但係未必人人都好似田少咁有米，可以次次坐頭等位。
九月揸波子遊法國
除咗郵輪之旅，田少打算喺九月去法國南部，參加Porsche Travel Club（保時捷旅遊會）嘅「自駕遊」，沿途經過康城、尼斯同蒙地卡羅等地方。田少諗諗吓都覺得為安全計，做足預防措施好啲，所以下個月去意大利首都羅馬呢啲人煙稠密嘅城市時，會乖乖哋戴番個口罩。