立法會訪粵團上禮拜五抵達深圳當晚，林健鋒同梁君彥請咗隨團記者消夜，期間梁君彥唔知係咪飲大咗，笑言前經濟及勞工局局長葉澍堃將任3L嘅主席，而同記者一齊飲香蕉奶昔嘅林健鋒，更言之鑿鑿咁話商務及經濟發展局前局長馬時亨會做行政總裁。好彩在場大部分記者都深知佢哋鍾意講笑搞Gag，冇當真咁報道出街。
然而有個別唔喺現場嘅記者，就喺以訛傳訛下，當真咁報道出街，搞到當事人冇辦法唔出嚟澄清。作為林健鋒波友嘅肥亨話已直接打電話省咗林健鋒一鑊，叫對方唔好擺佢上枱。
葉澍堃亦話早前喺一項活動上撞到梁君彥同梁劉柔芬，即場被邀擔任佢哋嘅新主席，當時佢覺得對方只係講笑，事後亦估計對方只想搞吓Gag，但今次個Gag太有「新意」喇！佢話3L依家已搵到一個「SL」（資深「L」君，指鄉議局主席劉皇發）加盟組成4L，佢自己嘅姓氏又唔係以「L」做字頭，使乜搵佢呢？
查實發叔加盟嘅傳聞，亦係由林健鋒同梁君彥喺立法會走廊同記者吹水吹出嚟，事後發叔多次話絕無其事，暗示佢同呢兩名前高官一樣，畀呢兩劑山草藥擺咗上枱。