本文重點
喺金融海嘯同人類豬流感（H1N1甲型流感）夾擊下，香港經濟大衰退，但政府仲要等到下個月先推出紓解民困嘅措施，都唔知等乜？
老實講，金融海嘯爆發至今，唔少打工仔被裁員減薪，而建仔嘅陳鑑林聽日就喺立法會大會上提出動議，叫政府搞好個環境，等企業可以履行社會責任；仲要求政府同商界傾傾，叫企業顧吓社會整體利益，掛住賺錢之餘唔好裁員減薪。
既然有位出，選票至上，其他黨派同工會代表撲晒出嚟撈油水，將所屬黨派嘅意見乘機講埋出嚟，變咗一拖九，原動議加埋修訂議案總共十項，好似十面埋伏咁，對準政府開刀。
商界一直高舉自由市場嘅旗幟，動議講到叫企業唔好減薪裁員，梗係觸動商界嘅敏感神經啦！難怪富貴黨嘅「肥仔張」張宇人提出修訂，將原議案改得溫和啲，變成叫政府鼓勵企業喺自願同能力所及嘅原則下，多盡社會責任，同埋盡力不裁員減薪。
與此同時，代表基層嘅議員亦唔放過機會，好似職工盟李卓人同工聯會葉偉明，分別提修訂要求恢復集體談判權，同埋叫政府研究，立法要求企業每年出份企業社會責任報告書。
商界基層代表各不相讓
代表唔同立場嘅議員各自出招，大家都有啲衝住對方而嚟咁。好似有代表工商界嘅議員話，企業都想履行社會責任，要有條件先做到，所以講到明要恢復集體談判權，梗係好難啃啦！同一道理，明明係叫企業唔好減薪裁員，但變成鼓勵企業盡量唔減薪裁員，勞工界議員咪一樣難以接受！
須知道呢項議案要分組點票，換言之要地區直選同功能組別議員都支持先獲通過，如今商界代表佔優嘅功能組別，同基層代表佔優嘅地區直選都各不相讓，原本係十面埋伏，結局隨時嚟個「十大皆空」，原動議加九個修訂全部過唔到，咁咪即係變成吹水唔抹嘴囉！