香港嘅防疫把關向來漏洞多籮籮，「把關不力」就成日有啫，呢次竟然「把關得力」喎，難怪食物及衞生局副局長梁卓偉一時唔偷雞就做保長，鬆毛鬆翼咁話證明把關衞生防疫措施體溫檢測以及健康申報好使得。
好心啦，當局成日吹噓嘅所謂防疫三道防線根本得啖笑，繼第一個墨西哥患者掂行掂過來港入住維景酒店之後，第二宗確診個案患者喺有病徵嘅情況下連過邊境三關，如果唔係佢自動求診都唔知，咁嘅防疫措施簡直就係兒戲過兒戲啦！
據「東方報業民意調查」指出，對於確診個案患者可以成功闖關，三成六受訪市民直斥當局冇做好把關工作，外國傳入個案會陸續增加；三成二就話機場口岸檢測措施有漏洞；百分之七認為防疫措施失效，靠政府抗疫不如靠自己。
日本證實出現豬流感本土確診個案，疫情爆到七彩。而日本又係港人嘅旅遊勝地，豬流感要經旅客傳過嚟香港真係話都冇咁易。輿論希望當局可以學日本以及內地咁，派防疫人員上飛機檢疫。防疫嘅嘢，梗係寧緊莫鬆㗎啦，點知食物及衞生局局長周一嶽打死都唔肯採納。
有三成一受訪者直斥周一嶽怕事，無法有效堵截患者入境；兩成八擔心豬流感隨時喺香港大規模爆發；一成三唔滿意當局冇危機感。
傳染病專科醫生勞永樂表示，事件反映咗港府嘅口岸防疫線係形同虛設，防疫重點又放錯咗，醫院隔離配套仍然唔足夠，特別係喺流感高峰期，估計最多有四萬人需要住院，醫院點頂得順。
其實港府都唔係咁後知後覺㗎，呢嗱，當局老早已經計劃定，如果有日一個唔好彩豬流感喺社區爆發，已經準備咗最少四個度假營地，接收曾經同確診患者有密切接觸嘅人士隔離七日。
之不過呢班懶官做乜都係甩皮甩骨，本報記者去睇過呢啲營地嘅保安，漏洞多過乜，直情好似無掩雞籠咁，沿住山路可以行入營地，營地後門亦可以自出自入。隔離人士悶悶地行出去散下心，容乜易將病毒擴散開去，後果可大可小。
話時話，金融海嘯、豬流感連環打擊下，依家嘅環境已經比○三年沙士更困難。政府好罕有咁喺五月就大幅下調全年經濟預測，由原先收縮百分之二至百分之三，調至收縮百分之五點五至六點五。
調查顯示，五成一受訪者認為喺豬流感影響之下，各行各業都受到影響；認為旅遊業會首當其衝嘅佔咗兩成八；其餘最受衝擊嘅行業包括酒店業以及零售業，分別佔咗一成一以及百分之四。
唔係講笑，去年十二月至今，至少已經有二百間酒吧執笠，如果獲豁免嘅酒吧等娛樂場所今年七月一日起如期加入全面禁煙行列，到時更加雪上加霜，業界估計，全港半數約四百間酒吧想唔執笠都幾難，逼到業界要本周日上街抗議叫救命。
叮佢個鎯鎯，呢個政府抗疫無方，救市無力，唔好話太一叮唔單聲，因住全港七百萬人喺七月一日一齊上街叮爆政府總部呀！