富貴黨嘅新星「哪吒」方國珊尋日駕車行經觀塘繞道時，前面有架裝滿搭棚竹枝嘅貨車行車時不斷有竹枝跌落路面，跟住貨車嘅房車兩個前胎仲畀竹枝插穿咗，哪吒見狀即時從後追截貨車，一路追到將軍澳寶順路終於「截車」成功。
見危機解除，哪吒仲落車同其他司機夾手夾腳將嗰幾紮竹搬埋一邊，又以證人身份向將軍澳隧道嘅職員詳述事發經過，仲堅持等埋交通警到場處理事件先肯離開，足足等咗半個鐘，交通警至到場。
哪吒話將軍澳環保大道同隧道成日都有類似嘅事發生，大部分交通意外都係因為運送廢物去堆填區傾倒嘅貨車超載所致，佢早前就以區議員身份叫警方加強檢控。警方有幾重視呢個問題？大家諗吓哪吒尋日等交通警等咗幾耐就知啦！
