政府以為收編民主派嘅單仲偕入西九文化區管理局做薪酬委員會主席，冚住泛民把口，就可以耳根清淨啲，睇嚟政府打錯算盤，政府真正需要收編嘅應該係幾位「文化界長毛」至啱，一日未做到，西九文化區都只會喺喧鬧聲中上路。
身兼西九龍民間評審聯席成員嘅胡恩威，尋日喺大氣電波聲討西九管理局，彈到管理局一文不值，其中正正就係質問港府，單仲偕對文化藝術認識有幾多？憑乜嘢坐呢個位？然後再批西九執行大員、民政事務局副秘書長朱曼鈴，鬧朱小姐為官高高在上，唔同業界溝通。
胡恩威鬧得興起，仲直指政府卑鄙，西九大計要社會支持，就要同文化藝術界傾，但自從上年中得立法會撥款二百幾億元放行後，就影都唔見，過橋抽板！
出席同一節目嘅黃英琦亦透露西九管理局諮詢委員會五月二十七號先開首次會，即係佢做咗成員兩個幾月仲未開過會，佢都曾經諗過「如果我做唔到嘢，不如唔做嘞」咁話，同胡恩威一唱一和，寸爆管理局。