喺立法會嘅珠三角訪問團當中，有五個係無證議員，呢次訪粵只係獲發一次過嘅證件，事前白鴿黨主席「鐵頭仁」何俊仁話同廣東省領導見面時，會要求攞番個永久回鄉卡。廣東省領導尋日同訪問團座談，情況又點呢？因為嚴重超時，鐵頭仁冇得發問，即係連口都冇得開，點知喺會後嘅宴會時，竟然畀佢抽到水喎！
話說有名廣東省領導逐枱敬酒，自動送上門，鐵頭仁話冇回鄉卡返唔到內地，當兩個人交換卡片後，鐵頭仁竟然攞住對方張卡片話：「可唔可以用嚟過關㗎？」該名領導即刻話梗係唔得啦！
鐵頭仁呢次認真大想頭，若果攞住內地官員張卡片就可以過關，咁佢咪可以做「卡片仁」，趁住呢次訪問起勢咁向內地官員「收片」，收收埋埋一大疊，第日攞去過關，呢張卡片唔得，咪用第二張囉！簡直想創佢個心。
不過，係估唔到商務及經濟發展局副局長蘇錦樑早前「騷卡片」嚟幫外傭續期單嘢，又畀鐵頭仁擺上枱，喺內地官員面前玩多次啫！