身兼行政會議成員嘅香港公開大學校董會主席李業廣，尋日主持公大二十周年校友日嘅開幕儀式。李業廣做咗校董會主席成十年，仲有一個月就任期屆滿，可以功成身退。
公大校長梁智仁對李業廣多年嘅貢獻如數家珍，對佢「揼心口」嘅能力更加讚不絕口：「李主席真係一個籌款能手，○五年學校興建第二期校舍，我哋嗰時根本冇錢，最後全靠主席廣闊嘅人際網同個人魅力，先可以籌到巨款。」李業廣亦直認當年籌款「一呼百應」。
校長同主席合作無間，梁校長當然想李業廣繼續做落去啦，但法例訂明校董會主席最多做兩屆，佢好無奈咁話想留都留唔到，有啲失落，仲話同李業廣「緣分未盡」，預言日後一定會有好多合作機會添！